26 февраля 2026 г.

Munosabat

Munosabat
Prezidentimizning kitobga e’tibori – kelajakka qo‘yilgan mustahkam poydevor
    Prezident Shavkat Mirziyoyevning yoshlar bilan ularning tashabbuslarini qo‘llab-quvvatlash bo‘yicha qo‘shimcha imkoniyatlarga bag‘ishlangan muloqotini katta hayajon bilan kuzatdim.
     Muhtaram Prezidentimizning nutqini tinglar ekanman, ayniqsa, kitob va mutolaaga oid chuqur fikrlari har birimizni o‘yga toldirdi. Bu shunchaki so‘zlar emas, balki Yangi O‘zbekistonning ma’naviy poydevorini mustahkamlashga qaratilgan strategik chaqiriqdir.

Davlatimiz Rahbarining ta’kidlashicha, axborot xurujlari avj olayotgan bugungi kunda yoshlarimizni har tomonlama yetuk, tanqidiy fikrlovchi va ma’naviy immunitetga ega shaxslar etib tarbiyalashda kitobxonlikni ommalashtirish muhim vazifalardan biri bo‘lib qolishi qayd etildi. Kitob – inson tafakkurini charxlovchi, dunyoqarashini kengaytiruvchi, ma’naviyatini yuksaltiruvchi bebaho xazina. U faqatgina ma’lumot beruvchi vosita emas, balki shaxsni komil inson qilib tarbiyalovchi, uning qalbida ezgu g‘oyalarni uyg‘otuvchi qudratli kuchdir.

   Prezidentimizning bu ishlarni yangi bosqichga olib chiqish uchun tuzilgan “Kitobxonlik madaniyatini rivojlantirish” jamg‘armasi orqali eng iste’dodli yozuvchilarga ijodiy buyurtma berilishi va bir yil davomida oyiga 20 million so‘mdan haq to‘lanishi ijodkorlar uchun katta rag‘batdir. Shuningdek, eng sara xorijiy adabiyotlarni o‘zbek tiliga, milliy adabiyotlarni xorijiy tillarga tarjima qilish va chop etish xarajatining yarmi qoplanishi milliy adabiyotimizni jahon miqyosida tanitishga, jahon durdonalarini esa xalqimizga yetkazishga xizmat qiladi.

   Ta’lim tizimida ham kitobxonlikni rivojlantirishga alohida e’tibor qaratildi. Mutasaddilarga yangi o‘quv yiligacha eng yaxshi 100 ta asardan iborat kitoblar to‘plamini tayyorlab, barcha maktab va texnikumlarga yetkazish topshirildi. Bu yoshlarimizning adabiy didini shakllantirishda muhim ahamiyat kasb etadi. Eng faol kitobxon o‘quvchilarga 10 million so‘mdan mukofot berilishi esa yoshlarni mutolaaga yanada rag‘batlantiradi.

   Kitob savdosini rivojlantirish va aholiga kitobga bo‘lgan qulaylikni oshirish maqsadida tadbirkorlarga ham keng imkoniyatlar yaratilmoqda. Kutubxona, “book cafe” va kitob do‘konlari ochib, kitob savdosini oyiga 10 ming donadan oshirgan tadbirkorlarga uch yilga bir milliard so‘mgacha yetti foizli ssuda berish yo‘lga qo‘yilishi bu sohada tadbirkorlikni rivojlantirishga katta turtki beradi.

   Prezidentimizning bugungi nutqida ilgari surilgan bu keng ko‘lamli tashabbuslar kitobxonlik madaniyatini har tomonlama rivojlantirishga qaratilgan kompleks yondashuvni aks ettiradi. Bu nafaqat bugungi avlod, balki kelajak avlodlar uchun ham mustahkam ma’naviy poydevor yaratishga xizmat qiladi. Zero, kitobli millat – qudratli millatdir.

Men, bir kutubxonachi sifatida, Prezidentimizning nutqidan cheksiz ruhlandim va ilhomlandim. Bu ulkan tashabbuslar va ko‘rsatmalar bizning zimmamizga katta mas’uliyat yuklash bilan birga, kelajakka bo‘lgan ishonchimizni yanada mustahkamladi. Aholini, ayniqsa yosh avlodni kitobxonlikka oshno qilish, ularning ma’naviy dunyosini boyitish yo‘lida bor bilim, tajriba va kuch-g‘ayratimni ishga solishga bel bog‘ladim. Ishonamanki, Prezidentimizning bu ezgu g‘oyalari har bir kutubxonachining qalbida aks sado berib, yurtimizda kitobxonlik harakatini yangi cho‘qqilarga olib chiqadi.

Surayyo AHMEDOVA  Zangiota tumani axborot-kutubxona markazi rahbari