28 января 2022 г.

"Olov tutgan odam"

Islom Karimov – O‘zbekiston Respublikasining Birinchi Prezidenti, 1989 yildan 2016 yilga qadar mamlakatni boshqargan  rahbar, millat yetakchisi,  favqulodda zukko siyosatchi, kuchli jasorat, bukilmas iroda sohibi sifatida sodir bo‘layotgan murakkab voqea-hodisalarning mohiyatini teran anglagan, har bir yurtdoshining taqdiri uchun alohida mas’uliyatni his etgan. O‘zbekiston ahli uni haqli ravishda mustaqil mamlakatning me’mori, istiqlol kurashchisi va porloq istiqbol asoschisi deb biladi. U xalqaro maydonda Mustafo Kamol Otaturk (Turkiya), Sharl de Goll (Fransiya), Jorj Vashington hamda Franklin Ruzvelt (AQSH), Mahatma Gandi (Hindiston), Uinston Cherchill (Buyuk Britaniya) singari davlat arboblaridek obro‘-e’tibor qozondi. Dunyo siyosatining yetakchi namoyandalari uning fikriga quloq tutdi. U mudom xalq manfaatlarini o‘ylagan, hamisha mamlakat taraqqiyoti va farovonligini ko‘zlab faoliyat yuritgan oqil davlat rahbari, mohir siyosatchi edi.
          Toshkent viloyati Zangiota tumani axborot-kutubxona markazida O‘zbekiston Respublikasining  birinchi Prezidenti Islom Karimov tavalludi kuni munosabati bilan  «Yaxshilar yodi unutilmas» deb nomlangan xotira kechasi o‘tkazildi. Kechada AKM direktori S.Axmedova yig‘ilganlarga metin iroda va qat’iyat sohibi bo‘lgan I.Karimov ulug‘ sarbon sifatida ulkan maqsadlarni ilgari surganligi, xalqni ularga ishontira olganligi, shu tariqa mamlakatda ahillik, birdamlik muhiti yaratilganligi, Islom Abdug‘aniyevich Karimov siymosida O‘zbekiston chinakam Yurtboshiga ega bo‘lganligi haqida gapirib o‘tdilar. U xalq dardiga quloq tutib, uning ko‘ngliga yo‘l topa oldi, tinchlik va osoyishtalikni ta’minladi, eng muhimi, ko‘p millionli xalqni Vatan taraqqiyoti yo‘lida birlashtirib, olamshumul islohotlarga safarbar etdi. «Ulug‘ insonlar doimo barhayot» deb nomlangan kitoblar ko‘rgazmasi tashkil etildi hamda ko‘rgazmadan joy olgan Luqmon Bo‘rixonning «Olov tutgan odam» kitobining taqdimoti o‘tkazildi. Tadbirda  tuman mahallalarida yangi joriy etilgan «Yoshlar»  yetakchilari va kitobxonlar ishtirok etdilar. Tadbirdan so‘ng yoshlar yetakchilariga AKMga ekskursiya uyushtirilib, kitobxonlar uchun yaratilgan shart-sharoitlar hamda kitob fondi bilan tanishtirildi. Ishtirokchilarning 38 nafari kutubxonaga a’zo bo‘lib ,o‘zlari uchun zarur adabiyotlarni o‘qish uchun oldilar.