7 мая 2024 г.

Jadid adabiyoti namoyondalari

Zangiota axborot-kutubxona markazi
Jadid adabiyoti namoyondalari
Tarbiyaviy soat
XIX asrning oxiri — XX asrning boshlarida butun Sharq mamlakatlari bo‘ylab yoyilgan islohotchilik harakati chor Rosiyasi qo‘l ostida bo‘lgan Turkiston o‘lkasiga ham kirib keldi. Bu islohotchilik harakati tarixga «jadidchilik», uning vakillari esa«jadidlar» nomi bilan tarixga kirdi. O‘zbekiston mustaqil davlat sifatida siyosiy xaritada paydo bo‘lgan 1991 yildan hozirga qadar olib borilgan tadqiqotlarda, yozilgan turli mazmundagi maqolalarda jadidchilik harakatining mohiyati turlicha tadqiq va tahlil qilindi, uning ko‘lami hamda uni harakatga keltirgan shaxslar hayoti, ijodi, jamiyatga bo‘lgan ta’siri masalalari yoritildi.
 O‘zbek jamiyati, qolaversa, hukumat jadidchilik harakati va jadidlarning hayoti, faoliyati va ijodiy merosini keng o‘rganishga boshchilik qildi. Chunki jadidchilik harakati va jadidlar zamonaviy o‘zbek jamiyati va davlatchiligi shakllanishiga munosib hissa qo‘shdi, jadidlarining ilmiy va ijodiy merosi bugungi avlod tarbiyasida muhim o‘rni tutadi va ularda aks etgan g‘oyalar dolzarbligini yo‘qotgan emas.
Zangiota tumani axborot-kutubxona markazida 9 may Xotira va qadrlash kuni arafasida 14-umumiy o‘rta ta’lim maktabi  o‘qituvchi va  o‘quvchilari bilan “Jadid adabiyoti namoyondalari” nomli tarbiyaviy soat o‘tkazildi. Unda millatimiz ozodligi va obodligi, ma’rifati va saodati  uchun bor kuch va imkoniyatlarini sarflagan  hattoki shu yo‘lda jonlarini qurbon  qilgan  jadid bobolarimiz, ularning mashaqqatli hayot yo‘llari va  milliy uyg‘onish  g‘oyasi uchun kurashlari haqida so‘z bordi. Ishtirokchilar jadidlarni  xotirlab, Usmon Nosir, Abdulla Qodiriy, Abdulla Avloniy kabi ajdodlarimizning hayot yo‘llari, ular qoldirgan adabiy meros haqida suhbatlashdilar. Tadbir so‘nggida kutubxona bo‘ylab ekskursiya o‘tkazildi va mutaxassislar tomonidan o‘qish uchun kitoblar tavsiya qilindi.