5 ноября 2024 г.

Vatan nadir, tuqqon yerim, turg‘on yerim

Zangiota tumani axborot-kutubxona markazi
Vatan nadir, tuqqon yerim, turg‘on yerim
Yangi kutubxona ochilishi
Joriy yilning 4-noyabr kuni Toshkent viloyatidagi “Chorvoq” oromgohida atoqli shoir, xattot va tarjimon Sidqiy Xondayliqiy tavalludining 140 yilligi munosabati bilan "Vatan nadir, tuqqon yerim, turg‘on yerim!" nomli adabiy-maʼrifiy xotira kechasi bo‘lib o‘tdi. 
    Toshkent viloyati hokimligi hamda O‘zbekiston Yozuvchilar uyushmasi Toshkent viloyati bo‘limi hamkorligida o‘tkazilgan tadbirda ijodkorlar, keng jamoatchilik vakillari jam bo‘ldi. Ushbu tadbirda tuman axborot-kutubxona markazi direktori S. Axmedova va RMMM tuman bo’linmasi rahbari G.Tursunovalar ham ishtirok etdilar. Bu quvonchli yangilik haqida sizlarga ham ma’lumot berishni joiz deb bildik. 
   Maʼlumki, yurtimizda olib borilayotgan islohotlarda xalqimiz maʼnaviyatini yuksaltirishga beqiyos hissa qo‘shgan atoqli shoir va yozuvchilar, ijod ahli namoyandalarining tavallud sanalarini keng nishonlash hamda faoliyatini chuqur o‘rganish va targ‘ib etishga alohida eʼtibor qaratilmoqda. Sidqiy Xondayliqiy xotirasi va ijodiga bag‘ishlangan kecha ham ana shunday ezgu ishlarning davomidir. 
   Adabiy kechada Toshkent viloyati hokimi Zoyir Mirzayev, Bo‘stonliq tumani hokimi Jo‘rabek Ahmedov, O‘zbekiston Qahramoni Ibrohim G‘afurov, Yozuvchilar uyushmasi raisining birinchi o‘rinbosari Minhojiddin Mirzo, O‘zbekiston xalq shoiri Mahmud Toir, adabiyotshunos olim Bahodir Karim, “Saodat” jurnali bosh muharriri Munavvara Usmonova, shoir Zohidjon Olovlar so‘zga chiqdilar.  Tadbirda Sirojiddin Maxdum Mirzohidoxund o‘g‘li Sidqiy 1884-yili hozirgi Bo‘stonliq tumani Xondayliq qishlog‘ida tug‘ilib-o‘sgani, u lirik sheʼrlarida hayotiy, insoniy muhabbat, odamiylik singari yaxshi anʼanalarni davom ettirgani taʼkidlandi. 
   - Ilk sheʼrlarini “Shuhrat”, “Shevan” taxalluslari bilan yozgan, - dedi Ibrohim G‘afurov. -  Keyinroq barcha asarlarini Sidqiy Xondayliqiy taxallusi bilan chop ettirgan. Poetik ijodining asosiy qismini hajviyot va ijtimoiy sheʼrlar tashkil qiladi. Ijtimoiy mavzudagi sheʼrlari esa o‘sha davrning muhim voqealariga bag‘ishlangan.
   Tadbirda Minhojiddin Mirzo Zoir Mirzayevga O‘zbekiston Yozuvchilar uyushmasi “Adabiyot” nashriyotida chop etilgan Sidqiy Xondayliqiyning “Saylanma”sini tuhfa qildi.
   “Nazm va navo” ruhidagi adabiy kechada mumtoz kuy-qo‘shiqlar ijro etildi. Shoir sheʼrlaridan namunalar o‘qildi.