14 февраля 2023 г.

“Kasbim-faxrim”

#Zangiota_AKM
#Mahorat_darsi
#Kasbim_faxrim
Zangiota tumani axborot-kutubxona markazi tomonidan xalq ta’limi bo‘limiga qarashli 32-umumta’lim maktabida o‘quvchi yoshlarni kasbga yo‘naltirish va kutubxonachilik kasbini targ‘ib etish maqsadida “Kasbim-faxrim” deb nomlangan mahorat darsi  o‘tkazildi. Mahorat darsi axborot-kutubxona markazining xizmat  rahbari B. Fayziyeva tomonidan tashkil etildi. Mahorat darsida kutubxonachilik kasbi qadimiy kasblardan biri bo‘lib, u uzoq o‘tmishlardan buyon insoniyatning intelektual va ijtimoiy rivojlanishining ajralmas qismi bo‘lib kelayotganligi, mamlakat madaniyatining rivojlanishiga ta’sirchan hissa qo‘shishi, xalqimiz qadim-qadimdan kitobni moʻjizaviy  hayot darsligi deb e’zozlashi, ma’naviy tafakkur, xazinalar maskani - kutubxonaga hurmat va e’tibor bilan qaralgani va hozir ham shu e’zoz saqlanib qolganligi haqida so‘z yuritildi.
Shuningdek,  bitiruvchi sinf o‘quvchilariga kelajakda tanlagan kasblari bo‘yicha yetuk mutaxassislar bo‘lib yetishishlarida avvalo kitoblarni o‘rni beqiyosligi, jumladan  kutubxonachilik kasbi haqida tushuncha berib o‘tildi. Ularga hozirgi zamonaviy kutubxonachi - bu nafaqat o‘quvchiga kerak bo‘lgan kitobni tezda topadigan, balki bosma nashrlarni saqlashning barcha xususiyatlarini biladigan, tashrif buyuruvchilarga axborot xizmatlarini ko‘rsatadigan va zamonaviy tilni yaxshi biladigan mutaxassis, axborot texnologiyalarini boshqara oladigan kasb egasi bo‘lmog‘i lozimligi, kutubxonachi kompyuter dasturlarini bilishi,  odamlar bilan muloqot qilish malakasiga, yaxshi xotiraga ega bo‘lishi, kitob o‘qishni yaxshi ko‘rishi, xushmuomalalik, hissiy barqarorlik, qat’iyatlilik, diqqatlilik, aniqlik, tashkilotchilik,  sabr-toqat kabi fazilatlarga ega bo‘lishi kerakligi haqida batafsil tushuntirilib, kutubxonachilik kasbi faxrli kasblardan biri ekanligi ta’kidlandi va bu kasb keng targ‘ib qilindi.
Mahorat darsida   kutubxona fondida saqlanayotgan, yangi chop etilgan sara kitoblardan ko‘rgazma  tashkil qilinib, atoqli adib  Shuxratning “Oltin zanglamas” kitobi o‘qish uchun tavsiya qilindi. Tadbirda 30 nafar 11-sinf o‘quvchilari ishtirok etib, ko‘rgazma uchun olib borilgan  kitoblardan o‘qish uchun oldilar.