6 марта 2024 г.

“Yangi uyg‘onish davri – kitob va kutubxonadan boshlanadi”

Zangiota axborot-kutubxona markazi
“Yangi uyg‘onish davri – kitob va kutubxonadan boshlanadi”
Ma’naviy-ma’rifiy tadbiri.
Kitob tuganmas xazina, undan olgan bilimlarni umrning oxirigacha ham sarflay olmaymiz. Insonning kitobdan yaqin hamrohi, do‘sti, maslahatchisi yo‘q. Negaki kitob aqlni peshlovchi qayroqdir. Kitob tafakkur manbai bo‘lgani uchun ham xalqimiz uni nonday aziz, muqaddas deb e’zozlab, qadriga yetadi, sevib mutolaa qiladi.
Keyingi yillarda mamlakatimizda kitobxonlikni rivojlantirish borasida ko‘plab islohotlar amalga oshirilmoqda. Prezidentimiz tomonidan ilgari surilgan beshta muhim tashabbusning to‘rtinchisi yoshlar ma’naviyatini yuksaltirish, ular o‘rtasida kitobxonlikni keng targ‘ib qilish bo‘yicha tizimli ishlarni tashkil etishga yo‘naltirilgan.
Axborot- kutubxona markazida  mart oyidan boshlab “Yangi uyg‘onish davri – kitob va kutubxonadan boshlanadi” shiori ostida yil yakuniga qadar kitobxonlik kunlari o‘tkazish rejalashtirildi. Bugun 6 mart kuni axborot-kutubxona markazida  tashkil etilgan “Kitob-qalb quyoshi” nomli faol kitobxonlar klubi a’zolari bilan hamkorlikda 14-umumta’lim maktabining yuqori sinf o‘quvchilari uchun ma’naviy-ma’rifiy tadbir o‘tkazildi.
Tadbirda kitobxonlik madaniyati, kitob o‘qish orqali yoshlar ongini, dunyoqarashini tarbiyalash, kitob o‘qish sirlari, ularning o‘qishga rahbarlik qilish  haqida suhbat olib borildi. Tadbirga yig‘ilgan o‘quvchilar o‘qigan kitoblari, undan olgan taasurotlari va ibratlari haqida jo‘shib so‘zladilar. O‘zlari yozgan she’rlari, hikoyalari haqida o‘rtoqlashdilar. Shuningdek, an’anaga muvofiq tadbir ishtirokchilari yangi nashr etilgan kitoblar yuzasidan tashkil etilgan kitob ko‘rgazmasi bilan tanishdilar, qiziqtirgan kitoblarini o‘qish uchun oldilar.  Ularning bilimlarini, kitobxonlik darajalarini sinash uchun mutaxassislar tomonidan  rebus o‘yinlari o‘tkazildi.